As there are limited options and ordinary results in the conversion of Hindi text in various formats for reading, I am using English text for these Hindi stories. I know there are so many Hinglish users….but still, I will try to publish these stories in “Devnagri” and translate these horror stories in English for more readers..and as Indian Railways habitually sayas, “Inconvenience caused is deeply regretted.”
1). Stunt
Ek
mahatvkanshi film project jo aaj tak ki sabse zyada stunts waali film
banne jaa rahi thi jiske baare mey har jagah characha abhi se tez ho
gayi thi. Uss film ki kahani ek laalchi builder ki thi jiski nazar ek
poore gaon ki zameen par thi aur jisse hathiyaane kay liye wo kuch
bhi karne ko tayyar tha…..gaon waalo ki jaan bhi lena uske liye
khel tha par uska ek dardnaak annt hota hai.
Itne saare stunts
aur production ka budget kum karne kay liye uss film kay producer nay
ek door daraz kay peechde gaon ko chuna, jaha kay gaon waalo se usse
shooting kay liye badi jagah aasani se bhi mil gayi aur film kay liye
bahut hi kum paiso mey khatarnaak stunts bina ‘safety equipments’
kay saath karne ko bahut se bhole bhaale gaon waale raazi ho
gaye.
Wo laachi Producer saare intezaam se santusht hokar apne
production house ka kaam sambhalne waapas Mumbai chala jaata hai. Wo
iss film ki beech beech mey khabar lene laga.Ussi Producer kay
nirdesho kay anusaar film unit dwara bina safety measures kay gaon
waalo se bahut se khatarnaak stunts karvaye gaye jisme kai gaon waalo
maare gaye ya ghayal ho gaye. Film ki kaafi shooting abhi baaki thi
aur inn durghatnaao kay kaaran film unit par sthaniye logo aur police
ka dabaav badh raha tha.
Gaon waalo ka gussa dekh film unit
producer ko salah deti hai ki wo Mumbai se hi gaon waalo ko film ki
kamaai ka 99% hissa dene ka kagazi vaada kar lijiye. Baad mey unhe
thoda bahut muaawza dekar iss 99% profit baantne waale papers ko
farzi saabit karva denge….(”Ye bevkoof gaon waale hum logo se
case ladne aa jaayein wo hi bahut hoga….usse jeetna to door ki baat
hai.”) Producer ye baat maankar gaon mey wo legal papers bhijwa
deta hai jinme likha hota hai ki iss film se honay waali kamaai ka
99% hissa gaon waalo ko diya jaayega. 1% profit bhi film ki unit ka
kharcha poora karne kay liye liya jaa raha hai. Iss film se gaon ko
bahut badi aarthik madad milegi aur faayda hoga. Aisa karne se gaon
waalo aur police ka dabaav phir se kum ho jaata hai. Kuch dino baad,
Film ki unit ab producer se phone par ajeeb tarah se baatein karne
lagi thi. Producer ko laga ki wo sabhi gaon mey itne zyada din rehne
kay kaaran irritate ho gaye honge. Kuch hi dino mey film kay director
ka Producer ko phone aata hai ki film ka aakhri schedule shoot hona
hai jiska udghatan film ki poori unit aur gaon waale aapki upastithi
mey aapke haatho se hi chahte hai. Waha pahunchkar sabhi ka bartaav
usse atpatta sa lagta hai. Sabhi aakhri scene ki shooting turant
chahte thay.
Aakhri scene ek bridge par shoot hona tha
producer jaise hi ribbon kaat ta hai. Ek daravni hassi kay saath
director bhoot mey badal jaata hai aur bolta hai.
“Lights……camera……action.” Ye sunte hi ab tak uss film mey
kai stunts kay dauraan maare gaye gaon waalo kay shat vikshat shav
achanak se prakat ho kar uss producer ki taraf badhte hai…..darr se
kaamp raha producer madad kay liye film Unit kay logo ki taraf daudta
hai par wo bhi bhooto mey badal chuke hotay hai. Tab uss producer ko
film ka bhoot director batata hai ki marre huey gaon waalo ki aatmao
nay poori film unit ko bhi maar daala tha.....aur issi kaaran unka
bartaav ajeeb ho gaya tha. Producer ki dardnaak maut kay saath hi
film ka aakhri schedule poora hota hai. Uss film kay prints apne aap
hi unn legal papers ki copy kay saath desh bhar kay distributors kay
paas pahunch jaatein hai. Film superhit hoti hai aur marre aur ghayal
gaonwaalo kay parijano ko unka haq milta hai.
The
End.
2). Mautniti
Kuch
mahino pehle hi Sindhar Rajya mey Jaago Dal naam ki party satta mey
aayi thi. Uss party ka satta mey aana ek chmatkaar tha kyoki bahut si
chhoti parties se gatbandhan karke pehli baar koi sadharan starr ki
party satta mey aayi thi.
Lekin aaye din Jaago Dal aur uske
sahiyogi dalo kay netao kay naam ghotaalo mey aa rahe thay. Kuch hi
mahino kay antraal mey ruling party ki lokpriyeta behadd kum ho gayi
thi aur aaye din sansad mey vikpakshi netao dwara kharab policies ki
ninda, reporters dwara sting operations, etc, se sattadhari party kay
neta pareshaan thay. Upar se Sindhar ki rajdhani Dhar aur uske aas
paas kay elako mey dangey bhadak gaye thay. Sthiti nazuk hoti jaa
rahi thi.
Ruling Party ki meeting hui jisme sabhi ko zaroori
nirdesh diye gaye. Meeting kay baad Cheif Minister Mahendra Madugar
nay kuch netao ko rook liya. Phir Chief Minister nay apni baat shuru
ki.
Mahendra Madugar - Kuch hi mahino mey humare bahut se
mantriyon par ghotaalo kay maamle darj ho gaye hai. Upar se humari
kai policies ki central agencies dwara jaanch chal rahi hai. Media
nay bhi jeena haraam kar rakha hai. Ye unki reports aur khabro ka hi
natija hai ki janta ab humse nafrat karne lagi hai. Yaani iss baat
kay poore aasaar hai ki humari sarkar agle election se bahut pehle hi
girne waali hai. Dango ko bhadkane mey karyakartao kay roop mey mere
aadmiyon ka haath tha taaki mai vipakshi parties ki image bigaad
sakun par patrakaaro aur deshbhakt netao ki wajah se ulta hi ho gaya.
Inn Dango nay humari chhavi aur zyada bigaad di hai.....lekin hum inn
dango ka ab bhi apne faayde kay liye isteymaal kar sakte hai. Kuch
reporters ki boli bahut nikalti hai aur wo yahin humari naak kay
neeche issi shehar mey reh kar kaam karte hai. Aur opposition kay
kuch mantri jo humare khilaaf janta ko bhadka rahe hai aur bade
campaign chala rahe hai.....inn sab ko dango ki aad lekar khatm karna
hoga.
Ek sawal uttha.
"Par Mukhya Mantri ji aisa
karne se to seedha shaq hum par jaayega."
Mahendra
Madugar - Isliye to maine Jaago dal kay khaas mantriyon ko meeting
kay baad rooka hai. Humey apne aur apne sahiyogi dalo kay bhi kuch
netao ko maarna padega tab kisi ko iss yojna ki bhanak nahi lagegi.
Arre, bhaiyon....Sarkar ko aage chalana hai to humey aise balidaan to
dene padenge. Ab dhyaan se suno jin mantriyon aur reporters ko maarna
hai maine sabki list bana li hai. Inme se zyadatar V.I.P. aur
celebrity ka darja haasil kar chuke hai isliye kisi ko gayab nahi kar
sakte sabki laashein milni chahiye. Inn sabko aise marvaao jaise ye
dango mey marre hon aur phir inhe dango mey marre logo kay saath
plant karva do.Matlab maarne kay baad inke shareer kay kuch anng
bhang kar dena ya bade bade ghaav kar dena. Inki Post Mortem reports
dango mey marr chuke logo jaisi lagni chahiye......nahi....balki mai
to kehta hun ki unse bhi asli lagni chahiye...ha ha ha ha ha ha
ha.
Wahan upasthit sabhi haiwaano kay thhahake goonjne lage.
Mahendra Madugar kay shadiyantra par amal hua aur berehmi kay saath
unke aadmiyon nay di gayi list kay anusaar bahut se mantriyon aur
reporters ko dango ki aad mey maar daala. Ussi shaam Ruling Party kay
unn sabhi jallado ka Chief Minister kay ghar par jhashn chal raha
tha. Sabhi iss kaamyabi ki wajah se saatve aasmaan par thay.
Kuch
dair baad darwaze par zor ki dastak hoti hai. Bahar bahut shor gul
tha. Sabhi neta ghabra gaye aur unhone apni security ko kai sandesh
bheje lekin koi jawab nahi mila. Saare mantriyon nay apna staff aur
suraksha karmi iss party ki wajah se pehle hi kum kar diye
thay.....par unke khaas bache huey suraksha karmi bhi ab unka jawab
nahi de rahe thay. Khidkiyon kay sheshay tootne lage aur bahar shor
badhta jaa raha tha.
Mahendra samet andar maujood darre huey
netao nay khud ko upar waale kamre mey bandh kar liya aur wahan se
bahar dekha to Dange ka drashya tha unke suraksha karmi behosh pade
thay.....bahut se gutt aapas mey bhide huey thay. Chief Minister ki
saari suraksha vyavastha gayab thi. Aakroshit bheed nay darwaza todd
diya aur wo andar ghus aayi. Phir jis kamre mey sabhi netao nay khud
ko bandh kar liya tha uska darwaza bhi todd diya gaya. Aakhri ummeed
kay saath sabhi neta kamre ka darwaza khulte hi tabadtood goliyan
chalate huey bachne kay liye neeche bhaage par unhone dekha ki neeche
bhi bahut log hai aur jin logo ko unhone goliyan maari thi wo bhi
unki taraf hastey huey badh rahe hai.
Ab achanak saari bheed
shat viskshat laashon mey badal gayi thi. Uss bheed mey se bahar aaye
unn Reporters aur Netao ki chalti phirti laashein jinhe Mahendra
Madugar aur uske saathi mantriyon nay marvaya tha. Ye manzar dekh kar
Mahendra aur uske saathi darr se jadd ho jaate hai. Har neta aur
patrakaar ki laash kay haath mey ek kaagaz tha. Wo kaagazo ko unn
darre sehme Ruling Party kay netao ko thama dete hai. Wo 'zinda' neta
unn kaagazo ko dekhte hai......wo kaagaz unhi ki post mortem reports
thi. Phir wo laashein unn netao ko unki pehle se hi bani post mortem
reports kay anusaar maar dete hai.
Kuch dair baad sandeh kay
aadhar par pahunchi Police ko wahan Sattadhari party kay Mukhya
Mantri Mahendra Madugar samet unke kuch mantriyon ki kuchli, kati,
shat vikshat laashein milti hai....jaise wo dango mey maare gaye ho
aur har laash kay upar uski post mortem report rakhi hui thi.
The
End!
3). Deadly Deal
Mr.
Karan Verma ek sarkari karmchari thay unki naukri kay ab kuch hi saal
reh gaye thay. Unki patni ek grahni thi aur unke 2 ladke aur 1 ladki
thi(Dilip,Rohan aur Akansha).Unki aarthik sthiti samanya thi,unkey
teeno bachche jawaan ho chuke thay par unka chhota beta,Rohan maansik
roop se kamzoor tha.Unki aarthik sthiti par unka chhota beta bhojh
bana hua tha aur bachpan se ab tak usse gharwaalo ki dutkaar hi mili
thi. Phir bhi wo sabhi ko apna maankar unse baatein karne ki naakaam
kosishein karta rehta.Din kat rahe thay ki tabhi Mr. Karan ka Heart
Fail ho gaya aur unhe Hospital mey bharti karvaya gaya. Mr. Karan
pehle hi apni jawaan beti ki shaadi aur ghar ki sthiti ko lekar
chintit thay aur ab unka Heart Failure honay se jaise poore ghar par
pahaad toot pada. Doctors nay Heart Transplant ki baat kahi aur jiske
liye Verma parivaar ko jald hi lakho rupaye jutane ko kaha gaya.Itni
jaldi itna saara paisa jutana parivaar mey kisi kay bas ki baat nahi
thi aur Heart Transplant kay liye Mr. Karan kay matching blood group
ka dil dhoondna bhi mushkil lag raha tha.
Sabhi gharwaalo nay
Rohan ko maarkar Mr. Karan kay Heart Transplant kay liye uska dil
isteymaal karne ka shadiyantra racha.Rohan ko sotay huey ak kamre mey
bandh kar diya gaya aur uss kamre mey angithi jala di gayi,Rohan
bahut dair tak chillata raha usse apno par vishvaas tha par uske apne
aaj uske vishvaas kay saath saath usse bhi maar rahe thay.Jald hi
kamre mey gaadha dhuaa aur Carbon Mono Oxide jaisi jehrili gases bhar
gayi aur dum ghutne se tadapte Rohan nay dum todd diya. Sabhi
gharwaalo nay jald hi iss haadse ka naatak duniya kay saamne kiya aur
ghar kay mukhiya ki haalat ki dhuhaai dekar Rohan ka dil Mr. Karan
mey transplant karne ki guzarish ki jo turant hi maan li gayi aur
Rohan ki maut kay kuch hi ghanto baad uska dil uske pita mey
transplant ho raha tha.Mr. Karan ko Rohan ki maut kay baare mey sabhi
gharwaalo nay sach-sach bata diya par Mr. Karan to apne parivaar sey
bhi do kadam aage nikle aur operation kay baad Ardh-behoshi ki haalat
mey hi sabhi ko unke kaam ki shabashi di aur Rohan kay doosre anngo
ko baichne kay sujhaav bhi de daala. Rohan kay lagbhag sabhi aantrik
anng jo bik saktey thay uske besharm parivaar waalo nay jaldi hi gair
kanooni tareke sey thikaane laga diye. Ab Verma pariaar kay paas
lakho rupaye aa chuke thay jinse naa sirf Karan Verma kay Heart
Transplant kay operation ka kharcha chuka diya gaya balki ab unki
aarthik sthiti bhi sudhar chuki thi.
Unn
sabhi nay uss paise kay ak bahut bade hissey se ak shaandaar Car
khareedi. Mr. Karan Verma abhi poori tarah se recover nahi huey thay
isliye kuch dino tak unhe hospital mey hi guzarne thay. Mr. Karan ko
chhodkar sabhi nayi Car ki pehli sair par nikle........thodi dair
baad unki Car aniyantrit hokar ak sunsaan sthaan kay andhiare kinare
par ruk gayi.Car kay darwaze nahi khul rahe thay aur uska Air
Conditioner kharab engine ka uddta dhuaa andar kheench raha tha.Sabhi
ka dum ghut raha tha aur unki haalat bigad rahi thi par unki haalat
ko dekhne waala waha koi nahi tha.Tabhi sabko Car mey apne saath ak
chauthi aakriti bhi tadapti hui nazar aayi.......uss aakriti par
Dilip nay Torch ki roshni maari......wo Rohan tha.......ya yu kahein
ki Rohan ki aatma ya bhoot tha.Sabhi parivaar waalo ki Rohan ki tarah
hi dum ghutne se maut ho gayi.....lekin Rohan nay aakhri waqt mey
unka saath nahi chhoda.
Idhar Mr. Karan Verma hospital mey
ajeeb harkate kar rahe thay aisa lag raha tha jaise wo pagal ho gaye
ho.Har guzarte ghantey kay saath Unki haalat bigadti jaa rahi thi aur
kuch hi ghanto mey to wo kisi Maansik roop se kamzoor vyakti ki tarah
harkate kar rahe thay.Doctors nay jaanch ki aur Karan Verma kay iss
bartaav ki wagah batayi haal hi mey unke shareer mey transplant huey
dil ki jiske aniyamit karya kay kaaran Mr. Karan Verma kay dimaag kay
kai hisso par khoon kay thhakey jam gaye thay aur unke kai anng bhi
asamanya karya kar rahe thay.
Rohan ki aatma nay apna
pratishood le liya tha.....lekin usne unn logo ko chhod diya jinhone
uske anng khareede thay.
The
End!
4). Fight for the Right
Daren – “Papa...abhi mat jao.... “
John
- (Daren ko apni godd mey utthakar) – “Mai waapas aaunga mere
bachche.”
Do padosi desh "Razed" aur "Prak"
kay beech lambe arse se tanaav aur seema vivaad chal raha tha aur ab
sthiti halke yuddh tak pahunch gayi thi.
Seema kay aas-paas
dono desho ki senao me badhotri honay lagi.
Prak ka rajya ak
Tanashah, Malsun kay haatho mey tha. Iss vivaad ko shaant karne kay
liye videsh se ak shaanti dall aaya aur uske rakhe prastaavo aur
baato se doono desho kay rukh mey kuch narmi nazar aane lagi. Dono
desho ki senao ko ladaai rookne aur peeche hatne ka aadesh mila par
Prak kay karta dharta Malsun kay dimaag mey kuch aur hi chal raha
tha. Razed kay kai sainik ab laut chuke thay aur bachi hui asaavdhan
Razed ki sena par Prak ka aakrman hua aur lagbhag sabhi bache huey
Razed kay sainik maare gaye.
Prak nay iss sthiti ka faayda
utthate huey Razed desh ka kaafi shetra apne kabze mey kar liya.
Ladaai aur naa bhadke isliye Antarashrtriya Shaanti Committee nay
faisla Prak kay haq mey sunaya. Kamzoor Razed desh bhi chhup ho
gaya.Samay kay saath ye mamla thanda pad gaya. Iss chhal yuddh mey
Razed kay shaheed huey ak sainik John ka Beta Daren ab javaan ho
chuka tha aur wo bhi apne pita ki tarah sena mey bharti ho chuka
tha.
Samay khud ko dohra raha tha aur lagbhag 25 saal baad
phir se Park nay Asaavdhan aur peechli baato ko bhul rahe Razed par
hamla kar diya tha. Razed aur Prak ki seemao par tanaav badh raha
tha. Razed ki sthiti ab bhi kamzoor thi.Seema par ab Razed kay kuch
hi sainik apni dharti ki raksha karne kay liye zinda bache thay jinme
se ak Daren bhi tha.Ye bhi sanyoog tha ki kroor Mansul abhi bhi Prak
ka shashak tha aur ussi kay aadesh se ye kayartapoorna hamla hua
tha.
Daren - "Hello....This is "Slope" to
"Delta base".....reading me.......humey backup ki zarurat
hai......yaha halaat kharab hai.....aur "Nasties" aage badh
rahe hai,Over."
"This is 'D-Base' to 'Slope' backup
bhejey jaa rahien hai,Over."
Daren- "Slope to Delta
Base......mujhe backup troops dikh rahe hai."
"D-Base
to Slope, abhi to backup troops base se kuch hi doori par pahunche
hai......itni jaldi waha kaise pahunch gaye. Are you sure
that...."
Par aage baat ho paati iss se pehle hi
Transmission mey baadha aa gayi.
Daren khush tha ki ab ab uski
sena ka paksh thoda mazboot hua hai aur wo apne desh ka aur nuksaan
honay se bacha lega.Daren josh aur gusse kay saath aage badha par
tabhi usne dhyaan diya ki uske saath iss hamle mey bache sainik to
saavdhani se aad lekar aage badh rahe thay par unke Backup troops kay
sainik nidarr hokar badhe jaa rahe thay aur unke hathiyaar bhi purane
lag rahe thay.Daren nay unhe rookne ki kosish ki kyoki wo
dheere-dheere chhupkar aage badhne kay paksh mey tha par uski baat
kisi nay naa suni.
Baazi palat gayi thi aur ab palda Razed ki
taraf jhuk raha tha ki tabhi khule maidaan mey bekhoof aage badh rahe
backup sainiko par Planes se hawaai hamla hua. Iss hamle se maidaan
me bhaag rahe lagbhag sabhi sainiko ka marna pakka maana jaa raha tha
par jab dhuaa chhata to nazara behad bhayanak tha kyoki kate pair,
Bina sar kay dhadd,shatigasth haath......yaha tak ki alag hui
aankhien bhi Prak kay saniko ki taraf badh rahi thi.Ye nazara to
morche par bache Razed kay sainiko ki bhi saanse rook raha tha.Daren
abhi hairat se ye sab dekh hi raha tha ki usne apne kandhe par ak
javaan saiknik ka haath mehsoos kiya.Usne mudkar dekha to aascharya
se wo jadd ho gaya......kuch bol na saka. Uss sainik ki aawaz dobara
gunji.
"Beta,
Maine kaha tha naa ki mai waapas aaunga.......".
Wo
John tha jo apne murda saathiyo kay saath apne desh kay upar dobara
ho rahe iss anyay ko rookne aa pahuncha tha.Jald hi Murdo nay Prak
kay sainiko par paar paa liya.Par phir bhi sabhi murda shareer
shatigrast haalat mey badhe jaa rahe thay......pata nah kya thi unki
manzil.....wo sabhi har baadha ko par kar aur kai hazaro kilometeres
ka safar tayy karke pahunche uss bunker tak jaha Prak ka shashak
Malsun chuppa hua tha.Murde zameen mey sama gaye aur bhumigat buker
kay neeche se nikle.Malsun ko bahut buri maut kay ghaat utaara
gaya.Agle din seema rekha kay nishaan 25 saal pehle waale thay aur
Razed ko apni khooyi zameen aur sammaan waapas mil gaya tha.
The
End!
5). Death ‘In-Corporated’
"Mr. Anuj, I am sorry.......he is dead."
Shri
Ranjan Kumar, 'Zest Industries' kay maalik apne shetra kay naami
business tycoons mey gine jaate thay par peechle kuch samay se unko
business mey bahut nuksaan jhelna pada tha. Mukhya Production units
ka bandh hona, company shares mey bhaari giravat, resonable
quotations kay bawajood bhi contracts aur tenders ka haath se nikal
jaana.....aakhirkaar unka har din badhta ye stress unki aatmhatya ka
kaaran ban gaya. Anuj Kumar unka eklauta beta tha jisko apne pita ka
business aur ye chintayein virasat mey mili thi. Ye kayaas lagaye jaa
rahe thay ki ghaate mey chal rahi Zest Industries jald hi bandh ho
jaayegi.
Kuch
dino baad.
Zest Industries kay head office kay sunsaan
corridor mey.
"Madam Renu, aapse kuch baatein karni
thi."
Renu - Mai ajnabiyon se iss tarah baat nahi
karti.
"Lekin office mey to aap har waqt gossip karti
rehti hai."
Renu - K..kaun hai aap?
"Tumhara
Boss."
Kuch dair baad uss corridor mey Renu ki laash
padi hui thi. Jiski vocal cord samet gardan kay andruni hisse bahar
kheenche gaye lag rahe thay.
Office mey retail executive kay
personal cabin mey.
"What nonsense....office stationary
ka iss tarah personal use aur wastage nahi hona chahiye,
Ramesh."
Ramesh - O Hello!! mister.....who are
you.....aur aap andar kaise aa gaye ?
"O Hello mujhe
nahi pehchana ? Mera naam Ranjan Kumar hai. Mai tumhara boss hua
karta tha. Tumhe yakeen nahi ho raha hoga.....lo dekho mera
chehra.....thoda sadd gaya hai par pehchan mey to aa raha hoga. Chalo
ab iss stationary ka achchha isteymaal kiya jaaye."
Kuch
hi seconds baad marre huey Ramesh ka shareer office stationary ka
godaam nazar aa raha tha.
Sab kuch bahut jaldi ho raha tha aaj
Zest Industries mey laasho ka dher lagne waala tha.
"Jamuna
Das ji aap budhe ho gaye hai....ab aap kaam nahi karte bas attendance
lagane aa jaate hai. Comapny kay puraane employee hai naa....sab
aapki bahut izzat karte hai....mai bhi karta tha....par buddhape mey
aapka dard aur mehnat mujhse dekhi nahi jaati. Arre kuch to
kahiye....."
Jamuna Das ji kuch kehne se pehle hi adhik
darr ki wajah se chal base thay.
Late Ranjan Kumar nay apni
company kay saare inefficient employees aur workers ko kuch hi dair
mey company se hamseha kay liye 'hata' diya tha.
Par silsila
yahin nahi ruka.
Zest Industries se kuch kilometers ki doori
par ek Bus Stop par.
"Bhaisahab, time kya hua hai
?"
"10:35."
"Bahut sardi hai....aaj
to aap late ho gaye, Madan Babu. Aapke office ka time to 10 baje ka
hai."
Madan - Haan, ye sab to adjust ho jaata hai. Waise
maine aapko pehchana nahi.
"Mujhe Ranjan kehte hai. Mai
aapki Company ka head tha."
Madan - What ?
"Arre,
aapki Bus aa gayi....jaldi kariye."
Achanak Madan ko uss
vyakti nay Bus kay aage dhakka de diya aur Madan ki Bus kay neeche aa
jaane se maut ho gayi.
Shehar
kay kuch naami contractors aur sarkari adhikari bhi maare gaye
thay.(Jinhone Zest Industries ki jagah uski rival company Den
Industries kikisi naa kisi roop mey madad ki thi.)
Shehar mey
ho rahi inn hatyaon ka rahasya ulajhta jaa raha tha. Pehle se hi
pareshaan Ranjan Kumar kay betey Anuj se Police shaq kay aadhar par
pooch taach kar rahi thi.
Lekin maut ka khel to tab bhi
badastoor jaari tha.
Place - Den
Industries.
"Congratulations Mister Manish, aapne to Den
Industries kay recruitment cell ki surat hi badal kar rakh di. Kitne
efficient employees chun rahe hai aap. Aur dekhiye 1 saal mey hi
promotion, presonal cabin, car, etc, etc, etc....."
Manish
- Thankyou, Mister Lalwant, par aapka appointment to 30 minutes baad
ka hai.
"Appointment to aapka hai.....maut kay
saath."
Manish - Excuse me, ye kya mazaak hai.
"Arre,
ye mazaak nahi hai.....achchha dekhiye mujhe...mai kya koi mazaak
karne waala lagta hun."
Manish ka achchha record uski
maut ban gaya tha.
Den Industries kay office kay bahar.
"Beta...zara sunna kahan jaa rahe ho ?"
"Den
Industries mey job kay liye apply karne."
"Ye
Company achchhi nahi hai, baaki jagah kosish karo."
"Lekin
mai yahan bhi apply karna chahta hun."
"Meri baat
suno bado ki baat aise nahi kaat te...tumhara academic record achchha
hai....Zest mey jaakar try karo....yahan to mujh jaise log rehte
hai.....dekho mujhe."
Uss surat ko dekh kar buri tarah
darra hua wo yuvak apne sabhi documents chhod kar wahan se bhaag
khada hua.
Den Industries ko unnchi quality kay raw materials
dene waale sabhi suppliers bhi maare gaye.
Anuj ko Police nay
chhod diya aur pareshaani se ghira Anuj waapas ghar lautne laga.
Lekin shayad uske pita nay uski pareshaani ko hamesha kay liye khatm
karne ka mann bana liya tha. Den Industries kay head Shri Sunil Daam
apni official meeting kay liye jaa rahe thay.
Sunil Daam -
Driver, Hotel Rasher le chalo.
Driver- 1 Company pehle aayi,
uske maalik nay khoob mehnat se sab jutaya...lekin doosri Company
aayi aur uske maalik nay business ethics ka khayal nahi rakha. Kyu
Daam...tum to bade ghatiya 'daam' kay insaan nikle.
Sunil Daam
- Ranjan ?
"Wah, tum to bahut chalak nikle itni jaldi
pehchan liya......ab jaldi marro....mai apne betey ko aur zyada
pareshaan nahi dekh sakta."
Driver ki seat khaali ho
gayi aur Sunil Daam ki gaadi bina driver kay aniyantrit ek doosri
gaadi se jaa takrayi. Dono gaadiyon ki takkar se bhayankar blast hua
aur dono gaadiyon kay parkhachhe udd gaye.
Doosri Car mey
Anuj baitha tha.
Iss haadse mey dono companies kay maliko kay
marrne kay baad Den Industries aur Zest Industries bandh ho gayi aur
apni company ki sthiti sudhaarne kay liye Ranjan Kumar ki aatma ka
khooni khel bandh hua.
The
End!
6) - Missing Flight
“Flight 297”, comic based on the concept of this story plot is available on Pothi.com & related networks on Internet. Search “Flight 297 by Mohit” or “Flight 297 Comic”
Dinesh
Fiji ka naagrik tha aur Bharat mey ak Air Traffic Controller kay roop
mey kai saalo se kaam kar raha tha. Uske liye aaj ka din bhi aam dino
jaisa tha. Apni desk par baitha wo tezi se kai Air Planes ko sambhal
raha tha aur kuch dair mey zyadatar Aeroplanes ko wo apni karya seema
se bahar bhej chuka tha.Ab wo apna kaam kuch aaram se kar raha tha.
Dosto se hassi-mazak, ghar ki baatein, aane waale dino kay plans
yahi sab uss Contol Tower par roz aam ki baatien thi.Aaj ka din bhi
aise hi guzar raha tha.Par aaj shayad Dinesh inn baato kay chakkar
mey apne kaam se kuch zyada hi vimukh ho gaya tha.
Dinesh -
"Flight 297......Flight 297......this is Northen Amausi
Base.....are you reading me.....hello....."
Ajay-“Kya
hua,Dinesh?”
Dinesh-"Flight 297 ko kuch dair pehle
sabhi updates di thi aur uske baad ab dekha to wo radar par nahi
hai.”
Ajay-“Oh God,Dobara dekh....kosish karte
raho.”
Lekin Dinesh ki anginat kosishein vifal rahi aur
Flight 297 se koi jawab nahi aaya. Dinesh ko uske ghar par haadse ki
jaanch honay tak nazarband kar diya gaya. Flight 297 aakhri update
tak Raguveerpur, Jharkhand, kay ghane jungleo se guzar rahi thi 1 din
beet jaane kay baad ab tak sabhi nay uss Flight kay surakshit honay
ki aas tyaag di thi aur uski khoj been ka kaam jaari tha. Dinesh ki
laaparwahi se kai log bahut gusse mey thay,Sarkar par janta aur
bahari desho se dabaav badhne laga. Dinesh par ak hi din mey kuch
jaanleva hamle bhi huey aur Bharat mey Fiji Dutavaas(Embassy) nay
Bharat Sarkar se Dinesh ko kuch dino tak gupchup tareke se Fiji mey
hirasat mey rakhne ka prastaav rakha taaki uski jaan ko koi khatra
naa ho. Dinesh Airport aaya aur usne Fiji jaa rahi Flight kay liye
Amausi Airport par "Check In" kiya. Jahan usko apna ek
parichit Flight Steward Tejas mila jisne usko plane tak
pahunchaya.......... par adhikariyon k anusaar check-in karne kay
baad Dinesh gayab ho gaya. Usse Airport par har jagah dhoonda jaa
raha tha par uska kahi pata nahi tha. Adhikariyo ko pehle se khabar
thi ki Dinesh Fiji logo se chhup kar jaa raha hai aur usko koi
nuksaan naa pahunche isliye uspar nazar bhi rah rahe thay par phir
naa jaane kaise wo gayab ho gaya. Sabhi ko yahi lag raha tha ki kisi
ugr sangathan kay sadasyo nay uska apharan kar liya hai.
LEKIN
DINESH TO FLIGHT MEY BAITH CHUKA THA.
Idhar Dinesh Plane mey
baith chuka tha aur uska plane udd bhi chuka
tha..................kuch dair tak to sab samanya raha par thodi dair
baad waha ka vatavaran Dinesh ko sandigdh laga. Sabhi yatriyo ki
nazar Dinesh par hi thi aur uski seat bhi sabse alag thi. Usne apne
bagal waale yatri se poocha ki ye flight kaha jaa rahi hai to sabhi
nay aksaath jawaab mey bas yahi kaha......
"Flight
297"
Dinesh ko iss jawab ki umeed nahi thi, wo sihar
uttha aur usse pata chal gaya ki uski galti ki saza dene khud uski
galti kay shikaar huey murde aaye hai.
Dinesh – “Par mujhe to yahan seat tak mera parichit Tejas laya.”
Tejas (vikrit jhulse hue chehre kay saath) – “Tum meri hi seat par baithe the, mere Dost. Mai Flight 297 ka crew member tha.” Plane mey phir se murdo ka sammilit swar gunjayman hua.
“Flight 297!”
Dinesh
– “Nahi!”
Agle din Flight 297 ka malba Raghuveerpur kay
Jungleo mey mil gaya sabhi yatriyo ki laasho kay avsesh bhi mil gaye
aur sabhi yatriyo ki pehchan,shinakht bhi ho gayi par sabka
aashcharya tab apni hadde todd gaya jab uss malbe mey uss vimaan mey
safar kar rahe yatriyo se ak laash zyada mili aur uss laash ki
pehchan Dinesh kay roop mey hui.
The
End!